मोरङ। सशस्त्र प्रहरी बोर्डर आउट पोस्ट (बिओपी)रानीले तस्करीको २४ तोला सुनको गहना र अवैध हुन्डीको साढे ६ लाख रुपैयाँसहित एकजना भारतीयलाई पक्राउ गरेको छ ।

भारतबाट तस्करी गरेर नेपालतर्फ ल्याउँदै गरेको उक्त सुनसहित  साढे ६ लाख रुपैयाँसहित भारतीय नागरिक पक्राउ परेका हुन ।

बिओपीले भारतको अररिया जिल्लाको जोगवनी नगर पञ्चायत–१३ घर भएका २५ वर्षीय दीपक भगतलाई विराटनगर–१७ इस्लामपुरबाट भारतीय नागरिकलाई पक्राउ गरेको हो ।

नेपाल–भारत बोर्डर सिल भए पनि खुला सीमाको फाइदा उठाउन चोर नाकाबाट बिहीबार साँझ उनी नेपाल प्रवेश गरेका थिए ।

चेकजाँचका क्रममा सशस्त्र प्रहरी टोलीले शरीरका विभिन्न भाग, जुत्ता, मोजा, अन्डरवेयरलगायतमा लुकाएर ल्याएको अवस्थामा पक्राउ गरेको थियो ।

पक्राउ परेका भगत अवैध सुन र हुन्डीको रकम ओसारपसार गर्ने भरिया मात्र भएको प्रहरीको अनुमान छ । सशस्त्र प्रहरीले भगतलाई आवश्यक अनुसन्धानका लागि इलाका प्रहरी रानीको जिम्मा लगाएको छ ।

अवैध कारोबारीले भारियामार्फत तस्करीको सुन भारत पठाएर आकर्षक गहना बनाएर फेरि नेपाल भित्र्याउने गर्छन् ।

यसैगरी, भारतबाट चाँदीका गरगहना पनि तस्करी गरेर ल्याउने गर्छन् ।