मकवानपुर । महिला कर्मचारीमाथि कुटपिट गरेको अभियोग लागेका पूर्व एसएसपी लोकेन्द्र बहादुर मल्ल ३ हजार धरौटी बुझाएर रिहा भएका छन् ।

जिल्ला प्रशासन कार्यालय मकवानपुरले रिद्धिसिद्धी सिमेन्ट उद्योगका महाप्रबन्धक रहेका मल्ललाई आज ३ हजार धरौटी लिएर छाडेको हो । मल्ल नेपाल प्रहरीका पूर्व एसएसपी हुन।

महिला कर्मचारीमाथि भएको विभेदबारे प्रहरी जानकार भएपनि गुपचुप राखिएको उक्त घटना उद्योगका कर्मचारीहरुले नै बाहिर ल्याएका थिए ।

प्रहरीले नै घटना लुकाउन खोजैको भन्दै हेटौँडाको चुरीयामाइमा रहेको रिद्धिसिद्धी सिमेन्टका कर्मचारीले दुई दिनदेखि उद्योग बन्द गराएपछि प्रहरीले बाध्य भएर मल्ललाई सोमबार पक्राउ गरेको थियो ।

अर्को पनि पढ्नैपर्ने

महिलालाई दुर्व्यवहार गरेको अभियोगमा नेपाल प्रहरीका पूर्व एसएसपी मल्ल पक्राउ

उद्योगमा कार्यरत महिला कर्मचारीले आफूलाई हातपात र दुर्व्यवहार गरेको भन्दै उजुरी दिएकी थिइन् ।

शुरुमा पीडितलाई सहमति गर्न दबाब दिए पनि सहमति नभएपछि हतार हतारमा जिल्ला प्रशासनमा उपस्थित गराई मल्ललाई आज छाडिएको हो ।

मकवानपुर प्रहरीले मंगलबार जिल्ला अदालतबाट सात दिनको म्याद थप गरेपनि आज जिल्ला प्रशासन लगेर छुटाएको हो ।

मल्लमाथि उद्योगभित्र कर्मचारीहरुमाथि आतंक खडा गरेको आरोप लागेको छ ।

रिद्धिसिद्धी सिमेन्टका अध्यक्ष शंकर ग्रुपका शंकरलाल अग्रवाल, कालोबजारीमा पक्राउ परि मुद्दा खेपेका सुलभ अग्रवालका भाई साहिल अग्रवाललगायतलले मल्ललाई छुटाउन प्रशासनमा दबाब दिएका थिए ।