काठमाडौँ। आन्तरिक राजस्व अनुसन्धान विभाग हरिहरभवन ललितपुरले झुट्टा तथा नक्कली मूल्य अभिवृद्धि (भ्याट)  करको बिल प्रयोग गरेर राजस्व छल गर्ने पर्साका प्रवीन्द्र शाह गोढविरुद्ध पाटन उच्च अदालतमा मुद्दा दायर गरेको छ ।

अभिनास इन्टरनेशनल प्रालिको सञ्चालक समेत रहेका उनले लामो समयदेखि मालवस्तु खरिद तथा आयात नगरी झुट्टा खरिद देखाई विभिन्न फर्महरुलाई बिल बिजक जारी गरेको र फर्महरुबाट लिएको रकमको मूल्य अभिवृद्धि करसमेत सरकारलाई नबुझेकोले उनीविरुद्ध मुद्दा दायर गरिएको  हो।

विभागले उनलाई ५ करोड २९ लाख रुपैयाँ बिगो असुली गरी जरिवाना र कैद माग दावीसहित उच्च अदालतमा मुद्दा दायर गरेको छ।

उनीविरुद्द मूल्य अभिवृद्धि करतर्फ एक करोड ८९ लाख रुपैयाँ, आयकर तर्फ २ करोड ९७ लाख रुपैयाँ र लाभांश करतर्फ ४३ लाख २६ हजार रुपैयाँ राजस्व चुहावट गरेको विभागको आरोप छ ।

साथै, उनीसँगै उक्त फर्मका बैङ्क खाता सञ्चालक जाबिर अन्सारीविरुद्ध पनि मुद्दा दायर भएको विभागले जनाएको छ ।