काठमाडौं । कोभिड–१९ संकट व्यवस्थापन केन्द्र (सीसीएमसी) बैठक सिंहदरबारमा सुरु भएको छ ।

बैठकमा बढ्दो कोरोनाभाइरस संक्रमण र त्यसको रोकथाम तथा अपनाउनुपर्ने रणनीतिबारे छलफल हुने बताइएको छ ।

यस्तै विद्यालय बन्द गर्ने वा नगर्ने भन्नेबारे पनि बैठकमा छलफल हुने बताइएको छ ।

सरकारलाई विद्यालय बन्द गर्न चौतर्फि दबाब परेको छ । स्वास्थ्य तथा जनसंख्या मन्त्रालयले १४ जिल्लालाई संवेदनशिल क्षेत्रको रुपमा घोषणा गर्दै ती क्षेत्रका बिद्यालय र भीडभाड हुने ठाउँ बन्द गर्न भनिसकेको छ भने काठमाडौं महानगरपालिकाले पनि संक्रमित देखिएका विद्यालय बन्द गर्न निर्देशन दिइसकेको छ ।

त्यसो त राष्ट्रिय सभाको संसदीय समितिले पनि तत्काल बन्द गर्न सरकारलाई शुक्रबार निर्देशन दिइसकेको हुँदा आजको बैठकमा यसबारे निर्णय हुनसक्ने बताइएको छ ।

पछिल्लो समय संक्रमण बढ्दै गएपछि सरकारले विद्यालय बन्दबारे निर्णय गर्न नसक्दा १४ जिल्लाका विद्यालयमा नजान आग्रह भने गरिसकेको छ ।

सरकारको यो आग्रहसँगै आम अभिभावक र विद्यार्थीमा अन्योलता उत्पन्न भएको छ ।