काठमाडौं । सर्वोच्च अदालत प्रशासनले प्रधानन्यायाधीश चोलेन्द्रशम्सेर जबराविरुद्ध आन्दोलनरत कानून व्यवसायीहरुलाई सर्वोच्च अदालत परिसरमा प्रदर्शन नगर्न चेतावनी दिएको छ।

सोमबार सर्वोच्च अदालत प्रशासनले प्रधानन्यायाधीश जबराको निर्देशन भन्दै नेपाल बार एसोसिएसनका अध्यक्ष चण्डेश्वर श्रेष्ठलाई फोन गरेर प्रदर्शन र नारावाजी नगर्न चेतावनी दिएको हो ।

अध्यक्ष चण्डेश्वर श्रेष्ठका अनुसार सर्वोच्च अदालत प्रशासनबाट हिजो उनलाई फोन गरिएको थियो । फोनमा सर्वोच्च अदालतको मूलगेटमा प्रदर्शन नगर्न र माइक प्रयोग नगर्न भनिएको छ।

तर, प्रधानन्यायाधीश जबराको राजीनामा नआउँदासम्म आफूहरुको कार्यक्रम यथावत रहने श्रेष्ठको भनाइ छ।

पछिल्लो समय कानून व्यवसायीहरुले नेपाल बार एसोसिएसनको अगुवाइमा हरेक दिन बिहान ११ बजेदेखि १२ बजेसम्म कालोपट्टी बाँधेर सर्वोच्च अदालतको मूलगेटमा प्रदर्शन गर्दै आएका छन् ।

उनीहरुले प्रधानन्यायाधीश जबरामाथि मन्त्रिपरिषदमा भाग खोजेकोदेखि सर्वोच्चका मुद्धाहरुमा सेटिङ गरेको लगायतका आरोप लगाउँदै न्यायपालिका सुधार आवश्यक रहेको भन्दै उनको राजीनामा मागेका छन्।