एजेन्सी । पेरिस सेन्ट जर्मेन (पीएसजी) ले शनिबार राति फ्रेन्च लिग वानमा क्लेरमोन्ट फुटमाथि ६–१ को सहज जित निकालेको छ । काइलियन एमबाप्पे र नेइमार दुबैले ह्याट्रिक गरेको खेलमा पीएसजी विजयी भएको हो ।

जितसँगै पीएसजीले शीर्ष स्थानमा १५ अंकको अग्रता लिएको छ । लिगमा अब सात चरणको खेल बाँकी हुँदा पीएसजीले ३१ खेलबाट ७१ अंक जोडेको छ ।

दोस्रो स्थानको रेनेसले समान खेलबाट ५६ अंक जोडेको छ । पराजित क्लेरमोन्ट फुट भने २८ अंकका साथ १७औं स्थानमा छ ।

पीएसजीको यो लगातार दोस्रो जित हो भने क्लेरमोन्टको यो लगातार पाँचौ हार हो ।