काठमाडौं । सुन तस्करी प्रकरणमा पूर्वउपराष्ट्रपति नन्दबहादुर पुनका छोराद्वय जितेन्द्र पुन र दिपेश पुनमाथि अनुसन्धान गर्न उपप्रधानमन्त्री एवं गृहमन्त्री रवि लामिछानेले प्रहरीलाई निर्देशन दिएका छन् ।

उनले प्रहरी महानिरीक्षक वसन्तबहादुर कुँवरलाई पुनमाथि छानबिन गर्न निर्देशन दिएका हुन् ।

लामिछानेको सचिवालयका अनुसार जितेन्द्र सुन तस्करीमा संलग्न भएको समाचार बाहिरिएपछि आईजीपी कुँवरलाई बोलाएर छानबिन गर्न निर्देशन दिइएको छ ।

पूर्वउपराष्ट्रपति छोरा जितेन्द्रले बुबाको पदीय हैसियतको आडमा सुन तस्करी गरेको आरोप छ ।

उनले चीनको एक कम्पीसँग उधारोमा चार किलो सुन किन्न ६ अक्टोबर २०१९ मा गरेको तमसुक समेत बाहिरिएको थियो ।

यस्तै पूर्वउपराष्ट्रपति पुनका अर्का छोरा दिपेश पनि सुन तस्करीमा मुछिएका थिए । उनीमाथि पनि अनुसन्धान जारी रहेको बताइएको छ ।

६० किलो सुन तस्करीमा संलग्न बेल्जियनका दावा छिरिङसँग दिपेशको कनेक्सन देखिएको थियो । प्रहरीले उनलाई बयान कागज गराएर छाडेको थियो भने सुन तस्करीबारे छानबिन गर्न गठित समितिले पनि उनको बयान लिएको थियो ।