पोखरा । पोखरामा एक अनलाइन डेलिभरीको कार्यालयमा चोरी गर्ने तीन जनालाई कास्की प्रहरीले पक्राउ गरेको छ ।
पक्राउ पर्नेहरुमा पोखरा महानगरपालिका–१५, टुटुंगाका अर्जुन परियार, पोखरा–१० का विकास अधिकारी र धादिङ घर भई पोखरा बस्दै आएका लोकेन्द्रबहादुर इटनी छन् ।
उनीहरुले गत २४ चैतमा पोखराको नयाँबजारस्थित एक अनलाइन डेलिभरीको अफिसमा चोरी गरेको प्रहरी अनुसन्धानबाट खुलेको छ ।
शौचालयको सिसा फोडेर भित्र प्रवेश गरी अनलाइन डेलिभरी अफिसको लकर नै बोकेर उनीहरु फरार भएका थिए ।
उक्त लकरमा ५ लाख ८२ हजार ५८० रुपैयाँ रहेको अनुसन्धानबाट खुलेको थियो । उक्त रकम भएको लकरसँगै उनीहरुले एक थान मोबाइल र पाँच थान झोलासमेत चोरी गरेका थिए ।
चोरी गरेर फरार उनीहरुलाई सोमबार वडा प्रहरी कार्यालय बैदामबाट खटिएको प्रहरी टोलीले पक्राउ गरेको हो । प्रहरीले उनीहरुबाट चोरी भएको लकर र झोलासमेत बरामद गरेको छ ।
Leave a Reply