काठमाडौं । सर्वोच्च अदालतको आदेशले गण्डकी प्रदेशका मुख्यमन्त्री खगराज अधिकारी कामचलाउ हैसियतमा पुगेका छन् । सर्वोच्चले शुक्रवार अल्पकालीन अन्तरिम आदेश जारी गरेसँगै मुख्यमन्त्री अधिकारी कामचलाउ हैसियतमा पुगेका हुन् ।

६० सदस्यीय प्रदेशसभामा ३० मत पाएकै आधारमा सभामुखबाट बहुमत पाएको घोषणा भएपछि मुख्यमन्त्री अधिकारी विवादमा तानिएका थिए ।

न्यायाधीश अब्दुल अजिज मुसलमानको इजलासले कांग्रेस गण्डकी प्रदेश संसदीय दलका नेता सुरेन्द्र पाण्डेयले दायर गरेको रिटमा अर्को सुनुवाइ नभएसम्मका लागि अन्तरिम आदेश जारी गरेको हो ।

सर्वोच्चले दुवै पक्षलाई छलफलमा बोलाउँदै लिखित जवाफ पनि माग गरेको छ। सर्वोच्चले यो मुद्दालाई गम्भीरतापूर्वक लिँदै पूर्ण सुनुवाइको मिति पनि तोकेको छ भने अधिकारीलाई दीर्घकालीन महत्त्व बोकेका निर्णय गर्नबाट रोक लगाएको छ ।