अछाम । अछामको चौरपाटी गाउँपालिकामा आधारभूत अस्पतालको निर्माण कार्य कछुवा गतिमा भइरहेको छ ।

दुई वर्षभित्र निर्माण सम्पन्न गरेर सञ्चालन गर्ने गरी तत्कालीन प्रधानमन्त्री केपी शर्मा ओलीले २०७७ मंसिर १७ गते तीन सय ९६ पालिकामा आधारभूत अस्पताल शिलान्यास गरेका थिए ।

सोही दिन चौरपाटी-१ मा पनि आधारभूत अस्पताल शिलान्यास भएको थियो । तर चार वर्षसम्म पनि सो अस्पतालको प्रगति कछुवा गतिमा भइरहेको हो । यहाँ १५ शय्याको आधारभूत अस्पताल बन्नेछ । तर निर्माणमा ढिलाइ हुँदा कहिले अस्पताल निर्माण हुन्छ भन्नेमा आशंका उब्जिएको छ । करिब १३ करोडको लगानी अस्पताल निर्माण भइरहेको छ ।

स्रोतका अनुसार अहिलेसम्म पाँच करोड भन्दा बढी रकम भुक्तानीसमेत भइसकेको छ । यो अस्पताल निर्माण गर्ने जिम्मा स्वार कन्स्ट्रक्सनले लिएको थियो । ढाई वर्षमा निर्माण सम्पन्न गर्ने गरी गाउँपालिकाकाले स्वार कन्स्ट्रक्सनसँग सम्झौता गरेको थियो । सो सम्झौता असार महिनामै सकिएको छ ।

अब फेरि म्याद थप गर्ने तयारी छ । तर बजेट अभावका कारण म्याद थप्ने विषयमा अन्यौलता छ । ठेकेदार कम्पनीको ढिलासुस्तीले काम कछुवा गतिमा भइरहेको आरोप लागेको छ । यस्तै स्थानीय सरकारले पनि अस्पताललाई बेवास्ता गरेको आरोप छ ।

तर यता गाउँपालिकाका इन्जिनियर लोकेन्द्र रावलले बजेट अभावका कारण निर्धारित सयमै काम गर्न नसकिएको बताए । सरकारबाटै बजेट नआएपछि काममा तीव्रता आउन नसकेका उनले सुनाए । उनका अनुसार अहिले अस्पतालको करिब ३० प्रतिशत काम सम्पन्न भइसकेको छ ।

सो अस्पताल निर्माणका लागि अघिल्लो वर्ष करिब दुई करोड ५० लाखसम्म बजेट आएको थियो । तर यस वर्ष भने बजेट नआएको इन्जिनियर रावलले जानकारी दिए । ठेकेदार कम्पनीले पेश्की स्वरूप ढाई करोड पनि लिएको उनले बताए । उनका अनुसार पेश्कीसहित करिब पाँच करोड रुपैयाँ भुक्तानी भइसकेको छ ।

तर पनि अस्पताल निर्माणले भने गति लिन सकेको छैन । आफूहरूले बजेट उपलब्ध गराइदिन सरकारलाई पटक पटक पत्र लेखेको पनि उनको भनाई छ । उनले भने, “बजेटका लागि पहल गरिरहेका छौँ । चिठी पठाउँछौँ हामीले । अघिल्लो वर्ष त लास्ट लास्टमा पठाएको थियो । मागेपछि मन्त्रालयले पठाउँदो रहेछ । सबै स्थानीय तहमा अस्पताल बन्दै छन् । उता पनि पैसाको अभाव होला ।”

यो आर्थिक वर्षभित्र अस्पताल निर्माण गरिसक्ने उनको भनाई छ । तर यो आर्थिक वर्षभित्रै निमार्ण कार्य सम्पन्न नहुने सम्भावना छ । अहिलेसम्म अस्पतालको पिलर मात्रै खडा गरिएका छन् ।

योसँगै आधारभूत अस्पतालबाट दुई वर्षमा निर्माण सम्पन्न गरी सेवा दिने सरकारको उद्देश्य पूरा नहुने निश्चित भएको छ । साथै अहिलेसम्म अस्पताल बन्न लागेको आधा जग्गा पनि अस्पतालको नाममा आउन सकेको छैन ।

उसो त यो अस्पतालको ठेक्का हुने बेला समेत मिलेमतोको आशंका गरिएको थियो । त्यस बेला पनि ठेक्का दिइएको विषय विवादमा थियो ।

अख्तियारले दिएको निर्देशनको अवज्ञा

यस्तै अस्पतालको तलबाट बनाइएको वाल पनि भत्किसकेको छ । करिब तीन करोड २५ लाख बजेटमा बनेको सो वाल निर्माण गरिएको केही समयमै भत्किएको थियो ।

अघिल्लो वर्षको असार महिनामा वाल भत्किएकोमा अहिलेसम्म पनि पुर्ननिर्माण गरिएको छैन । सो वाल भत्किएपछि गुणस्तरहीन काम भएको भन्दै अख्तियार दुरुपयोग अनुसन्धान आयोगको कार्यालय महेन्द्रनगरमा उजुरीसमेत परेको थियो । अख्तियारले वाल फेरि निर्माण गर्न निर्देशन पनि दियो ।

तर अख्तियारको सो निर्देशनको पनि पालना भएको छैन । वाल भत्किएको लामो समय बितिसक्दा पनि निर्माण कम्पनीले पुनः निर्माण गर्न अटेर गरिएको छ । अहिलेसम्म वाल निर्माण गरिएको छैन । गाउँपालिकाका इन्जिनियर रावलले वाल पुनः निर्माण गर्न भनिएको बताए ।