Jun 23 2026 | २०८३, आषाढ ९ गते
23 Jun 2026 | मंगलवार, आषाढ ९ गते २०८३
मंगलवार, आषाढ ९ गते २०८३
Jun 23 2026 | २०८३, आषाढ ९ गते
23 Jun 2026 | मंगलवार, आषाढ ९ गते २०८३
मंगलवार , आषाढ २४, २०८२
काठमाडौं । प्रधानमन्त्री केपी शर्मा ओलीले भोटेकोशी तथा त्रिशूली नदीमा आएको बाढीबाट प्रभावितलाई उद्धार गर्न सरकार युद्धस्तरमा लागेको जानकारी गराएका छन्।
प्रधानमन्त्री ओलीले आज सामाजिक सञ्जालमार्फत बाढीबाट प्रभावितलाई उद्धार गर्न र सरकारको तर्फबाट गरिने प्रयासमा कमी हुन नदिन निर्देशन दिएको बताएका हुन्।
उनले विपद् सम्भावित क्षेत्रमा आपातकालीन सहायता उपलब्ध गराउन समन्वय गरिएको पनि बताएका छन् ।
उनले फेसबुकमा लेखेका छन्–‘तिब्बतको सीमावर्ती क्षेत्रमा भएको भारी वर्षाका कारण त्रिशुली नदीमा आएको बाढीबाट प्रभावितलाई उद्धार गर्न सरकार युद्धस्तरमा लागेको छ।
बाढीले केही नागरिकको ज्यान गएको र केही बेपत्ता भएका दुःखद खबरहरु आएका छन्। ठूलो भौतिक क्षति पुर्याएको छ। ज्यान गुमाउने नागरिकप्रति श्रद्धाञ्जली अर्पण गर्दछु र विपद्को पीडामा रहनु भएका नागरिकप्रति सहानुभूति प्रकट गर्दछु।
यस दुःखद क्षणमा अत्यावश्यक बाहेक निर्धारित कार्यक्रमहरु स्थगित गरेर प्रभावित क्षेत्रमा भइरहेको उद्धारकार्य बारे सुरक्षा निकायसँग नियमित रिपोर्टिङ लिइरहेको छु।
विपद् संभावित क्षेत्रमा आपातकालीन सहायता उपलब्ध गराउन तीब्र समन्वय गरिएको छ, सरकारको तर्फबाट गरिने प्रयासमा कुनै कमी नहोस् भनेर निर्देशन दिइएको छ। सरकारी निकायहरुले उद्धारको काम गरिरहेका छन्। त्यसमा सबैको सहयोग अपेक्षा गर्दछु।’
त्यसअघि ओलीले सरकारले विपद् व्यवस्थापन विभागलाई ‘हाई एलर्ट’मा राखिएको जानकारी गराएका थिए ।
नेपाली सेनाको हेलिकोप्टरबाट त्रिशुली नदिमा फसेकाहरुको उद्दार हुँदै गरेको तस्विर राखेका प्रधानमन्त्री ओलीले फेसबुकमा लेखेका छन्–‘मौसमजन्य विपद्को उद्धारका लागि सरकारले विपद् व्यवस्थापन विभागलाई ‘हाई एलर्ट’मा राखेको छ ।
सशस्त्र प्रहरी बल, नेपाली सेना र नेपाल प्रहरीका स्वयंसेवकहरु आवश्यक साधन र उद्धार उपकरण सहित तैनाथ छन् र आफ्नो काम गरिरहेका छन्।
विपद् संभावित क्षेत्रमा खटिएको सुरक्षा निकायको सम्पर्क नम्बरहरु सार्वजनिक गरिएको छ। सूचना समन्वयका लागि सबैलाई अनुरोध गर्दछु ।’
© 2026 All right reserved to onlinenepal.com
Design & Developed By
