सिड्नी।  अमेरिकी कम्पनी नोभाभाक्सले  कोरोना भाइरस (कोभिड–१९)को  खोप परीक्षण सुरु गरेको छ । पहिलो चरणको परीक्षणमा अस्ट्रेलियामा १ सय ३१ जना स्वयंसेवीलाई खोप दिइने अमेरिकी कम्पनी नोभाभाक्सले जनाएको छ ।

कम्पनीका अनुसन्धान प्रमुख डा. ग्रेगरी ग्लेनले पहिलो चरणमा खोप लिएकाहरूमा यसको प्रभावकारिता परीक्षण गरी अन्य कदम चालिने जनाएका छन्।

कोरोना भाइरसविरुद्ध विश्वभरका दर्जनौं वैज्ञानिकले खोप परीक्षण गरिरहेका छन् । यसका लागि खासगरी अमेरिका, बेलायत, चीन, इजरायल, सिंगापुर र केही युरोपेली देश अग्रपंक्तिमा छन् ।

तर, अहिलेसम्म कुनै पनि खोप सुरक्षित र प्रभावी साबित भइसकेका छैनन् । वैज्ञानिकहरूले खोप निर्माणका लागि लामो समय लाग्ने बताइरहेका छन् ।

पशुहरूमा गरिएको परीक्षणमा खोपको न्यून डोज प्रभावकारी देखिएको ग्लेनको भनाइ छ । नोभाभाक्सले यस वर्ष कम्तीमा १० करोड डोज र अर्को वर्ष सन् २०२१ भित्रमा १।५ अर्ब डोज उत्पादन गर्ने उनको भनाइ छ ।