बेनी । म्याग्दी नदीमा डुबेर एक किशोरको मृत्यु भएको छ । नदीमा डुबेर बेपत्ता भएका मंगला–५ टिकावाङका १६ वर्षीय शंकर विकको शव बुधबार बिहान तीन दिनपछि फेला परेको हो ।

पोखरास्थित कालीका गणबाट आएको गोटाखोर टोलीले तलाउबाट बिकको शव निकालेको सशस्त्र प्रहरी बल आश्रित गुल्म म्याग्दीका प्रहरी नायब उपरीक्षक हरिबहादुर गुरुङले बताए ।

१२–१५ फिट गहिरो तलाउबाट शव निकालिएको थियो । छिसबाङस्थित म्याग्दी नदीमा सोमबार पौडी खेल्ने क्रममा विक बेपत्ता भएका थिए ।

जनपथ प्रहरी र स्थानीयले खोजी गर्दा नभेटिएपछि गाउँपालिका र जिल्ला प्रशासन कार्यालयमार्फत गोटाखोर टोली मगाइएको थियो । गृह मन्त्रालयसँग समन्वय गरी मगाइएको गोटाखोर टोलीले नदीको दहमा डुबेको अवस्थामा शव फेला पारेको बताइएको छ।