काठमाडौँ । मस्तिष्कघात भएका नेपाली कांग्रेसका नेता एवं पूर्वमन्त्री नवीन्द्रराज जोशीको उपचारका लागि सरकारले १० लाख सहयोग गर्ने भएको छ ।

शुक्रबार बिहान जोशीको स्वास्थ्य अवस्थाबारे जानकारी लिन अस्पताल पुगेका उपप्रधानमन्त्री ईश्वर पोखरेलले परिवारका सदस्यहरुलाई सहयोगबारे जानकारी गराएका हुन् ।

उपप्रधानमन्त्री पोखरेललाई अस्पतालका चिकित्सकहरुले जोशीको पछिल्लो स्वास्थ्य अवस्थाको बारेमा बताएका थिए ।

मस्तिष्कघात भएपछि नेता जोशीलाई फागुन १४ गते नर्भिक अस्पताल भर्ना गरिएको थियो । उनको स्वास्थ्यमा सुधार आउन सकेको छैन ।

उपचार सुरु भएको केही दिनपछि उनको अवस्थामा सुधार देखिएसँगै भेन्टिलेटरबाट बाहिर निकालिएको थियो । तर, त्यसको केही दिनपछि स्वास्थ्य अवस्था पुनः बिग्रिएपछि भेन्टिलेटरमै राखेर उपचार जारी राखिएको अस्पतालले जनाएको छ ।