धनुषा। जिल्ला प्रहरी कार्यालय धनुषाले कर्तव्य ज्यान मुद्दामा जन्मकैदको सजाय पाएका फरार प्रतिवादीलाई ३४ वर्षपछि पक्राउ गरेको छ ।

जिल्ला प्रहरी कार्यालय धनुषाका प्रहरीप्रमुख एसपी प्रकाश रानाभाटका अनुसार पक्राउ पर्नेमा धनुषाको सवैला नगरपालिका वडा नम्बर २ वस्ने वर्ष ७० का विकरू यादव रहेका छन् ।

कर्तव्य ज्यान मुद्दामा सर्वोच्च अदालतले २७ चैत २०४३ मा यादवलाई जन्म कैद (२० बर्ष) फैसला सुनाएको थियो ।

तर, हालसम्म फरार रहेका यादवलाई बुधबार दिउँसो औरही गाउँपालिका १ पौडेश्वर स्थित खेतमा काम गरिरहेको बेला प्रहरी टोलीले पक्राउ गरेको हो ।

पक्राउ परेका उनलाई जिल्ला अदालत धनुषामा हाजिर गराइएको छ । यादवलाई  जन्मकैदका लागि झुमका कारागार पठाउने आदेश भएको जिल्ला प्रहरी कार्यालय धनुषाका एसपी रानाभाटले बताए ।