बुटवल । राप्ती प्रादेशिक अस्पताल दाङका मेडिकल सुपरिटेन्डेन्ट डा. विनोद सिंहलाई कालोमोसो दलेको प्रकरणका आरोपित अनेरास्ववियू दाङका अध्यक्ष सर्जन परियारले प्रहरीमा आत्मसमर्पण गरेका छन् ।
जिल्ला प्रहरी कार्यालय दाङका अनुसार आरोपित अध्यक्ष परियारले मंगलबार आफैं प्रहरीमा उपस्थित भएर आत्मसमर्पण गरेका हुन् ।
चिकित्सकमाथि कालोमोसो दल्ने मुख्य आरोपीत ६ जनामध्ये अहिलेसम्म परियारसहित तीन जना पक्राउ परेका छन् । फरार रहेका तीन जनाको खोजी भइरहेको जिल्ला प्रहरी कार्यालय दाङका प्रवक्ता मुकुन्द रिजालले बताए ।
तर, परियारले भने प्रहरीले आफूमाथि लगाएको आरोप झुटो भएको भन्दै हिरासतभित्र भोकहड्ताल गर्ने बताएका छन् ।
पक्राउ परेकालाई स्वास्थ्यकर्मीहरुको सुरक्षा सम्बन्धी अध्यादेश २०७८ बमोजिम जिल्ला प्रहरी कार्यालय दाङमा मुद्दा दायर गरिएको दाङका सीडीओ रामबहादुर कुरुम्बाङले बताए ।
Leave a Reply