पर्सा । जिल्ला प्रहरी कार्यालय पर्साले अपहरण तथा शरीर बन्धक मुद्दाका फरार एक प्रतिवादीलाई पक्राउ गरेको छ।

पक्राउ पर्नेमा जिल्लाको जिराभवानी गाउँपालिका-६ शंकरसरैया बस्ने ५६ वर्षीय प्रयाग चौधरी रहेका छन्।

प्रहरीका अनुसार चौधरीलाई २०७० माघ १७ गते जिल्ला अदालत पर्साले उक्त मुद्दामा ९ वर्ष कैद र नगद ५० हजार रुपैयाँ जरिवाना ठहर गरेको थियो।

चौधरीलाई जिल्ला प्रहरी कार्यालय पर्साबाट खटिएको प्रहरीले महानगरीय अपराध महाशाखा र महानगरीय प्रहरी ‍वृत्त गौशाला काठमाडौंको समन्वयमा तिलगंगाबाट पक्राउ गरेको हो ।

चौधरीलगायतका फरार अन्य व्यक्तिहरु मिलेर २०६७ फागुन २४ गते भारत मुजफ्फरपुर मुसहरी बस्ने २० वर्षीय पुरुषलाई पर्सा वीरगंज महानगरपालिका-३२ बाट अपहरण गरी बन्धक बनाएको प्रहरीले जनाएको छ।

उनलाई फैसला कार्यान्वयनका लागि जिल्ला अदालत पर्सामा बुझाइने जिल्ला प्रहरी कार्यालय पर्साले जनाएको छ ।