काठमाडौं । कांग्रेसको १४ औं महाधिवेशनअन्तर्गत महामन्त्री पदको मतगणना जारी छ । सानेपास्थित कांग्रेस मुख्यालयमा बिहीबार बिहानबाट मतगणना सुरु भएको हो । अहिलेसम्म ३२२० मत गन्दा २१०१ मतका साथ गगन थापा पहिलो स्थानमा छन् ।

यो मतले गगनलाई लगभग महामन्त्रीमा जिताइसकेको छ । त्यसैगरी दोस्रो स्थामा विश्वप्रकाश शर्मा छन् । उनले १२८७ मत ल्याएका छन् । जसले गर्दा दुई महामन्त्री हुने कांग्रेसमा शर्माको पनि सम्भावना बलियो हुँदै गएको छ ।

प्रकाशशरण महत १०६१ मतसहित तेस्रो स्थानमा छन् भने चौथोमा रहेका प्रदीप पौडेलले ९७१ मत ल्याएका छन् । त्यस्तै हार्ने निश्चित भएपछि रक्षामन्त्रीबाट राजिनामा दिने घोषणा गरेका डा. मीनेन्द्र रिजालले ५६६ मत प्राप्त गरेका छन् भने राजाराम कार्कीले ७५ मत प्राप्त गरेका छन् ।

कांग्रेस विधानमा महाधिवेशनबाट दुई जना महामन्त्री निर्वाचित हुने व्यवस्था छ। महामन्त्रीमा ६ जनाबीच प्रतिस्पर्धा छ।

सभापति शेरबहादुर देउवा समूहबाट डा. प्रकाश शरण महत र प्रदीप पौडेल छन् भने डा। शेखर कोइराला समूहबाट गगन थापा र मिनेन्द्र रिजाल मैदानमा छन्।

यस्तै प्रकाशमान सिंह समूहबाट विश्वप्रकाश शर्मा र विमलेन्द्र निधि समूहबाट डा. राजाराम कार्की महामन्त्रीको उम्मेदवार छन्।

यसअघि सभापति र उपसभापतिको मतगणना सकिएको छ। सभापतिमा शेरबहादुर देउवा र उपसभापतिमा पूर्णबहादुर खड्का तथा धनराज गुरुङ निर्वाचित भएका छन्।

सोमबार भृकुटीमण्डपमा भएको मतदानमा कुल ४ हजार ६ सय ७९ मत खसेको थियो । कांग्रेसमा यसपटक सभापतिसहित १३४ पदमा निर्वाचन भएको छ ।