कैलाली । बझाङको एक वडाका अध्यक्ष र वडासचिवलाई योजनामा करोडौं भ्रष्टाचार गरेको भन्दै विप्लव नेतृत्वको नेपाल कम्युनिष्ट पार्टीनिकट अनेरास्वियु (क्रान्तिकारी) ले कालोमोसो दलेको छ ।

आइतबार अनेरास्वियु (क्रान्तिकारी) का कार्यकर्ताले बित्थडचिर गाँउपालिका-८ का वडाध्यक्ष जयबहादुर मल्ल र वडासचिव दत्तराम अवस्थीलाई कालोमोसो दलेका हुन् ।

वडाको योजना करोडौं भ्रष्टाचार गरेको, कमिशन दिनेलाई मात्र उपभोक्ता समितिमा राखेको, मृतकको नाममा सामाजिक सुरक्षाभत्ता दुरुपयोग गरेकोलगायत आधा दर्जनभन्दा बढी आरोप लगाउँदै मोसो दलेको अनेरास्वियु (क्रान्तिकारी) द्वारा प्रकाशित विज्ञप्तिमा उल्लेख छ ।

अनेरास्वियु )क्रान्तिकारी) सधैं जनताको पक्षमा रहेको बताउँदै स्थानीयको रिपोर्ट र संगठनको अध्ययनको आधारमा जनहितविपरित कार्य गरेको ठहर गर्दै कारबाही गरिएको अनेरास्वियु (क्रान्तिकारी) ले जनाएको छ ।