धनगढी । सुदूरपश्चिम प्रदेशमा थप ३३६ जनामा कोरोना पुष्टि भएको छ । स्वास्थ्य निर्देशनालय दीपायलले सार्वजनिक गरेको तथ्यांकअनुसार १ हजार २२५ जनाको एन्टिजेन र ६९ जनाको पीसीआर परीक्षण गर्दा आज २३६ जनामा संक्रमण पुष्टि भएको हो ।

आज संक्रमण पुष्टि भएकामध्ये ४७ जना आज नै भारतबाट फर्केका नागरिक हुन्। आज सुदूरपश्चिमका नाका भएर ६६६ जना स्वदेश फर्केका छन्। निर्देशनालयका अनुसार प्रदेशमा ४ हजार ७४३ जना सक्रिय संक्रमित पुगेका छन्।

उनीहरुमध्ये ७९ जनाको मात्रै अस्पतालमा उपचार भइरहेको छ भने अन्य सबै होम आइसोलेसनमा रहेका छन्। यस्तै पछिल्लो २४ घण्टामा कैलालीको सेती अस्पतालमा उपचाररत थप २ कोरोना संक्रमितको मृत्यु भएको छ।

कैलालीको गौरीगंगा नगरपालिकाकी ६५ वर्षीया महिलाको आइतबार बिहान मृत्यु भएको जिल्ला प्रशासन कार्यालय कैलालीका सूचना अधिकारी शिवराज जोशीले बताए ।

यसैगरी कञ्चनपुरको कृष्णपुर नगरपालिकाका ३१ वर्षीय पुरुषको आइतबार बिहान मृत्यु भएको स्वास्थ्य निर्देशनालय दीपायलले जनाएको छ ।