कैलाली । सुदूरपश्चिम प्रदेशमा थप २०३ जनामा कोरोना पुष्टि भएको छ । पछिल्लो २४ घण्टामा प्रदेशभर पीसीआर र एन्टिजेन विधिबाट ९६८ जनाको नमूना परीक्षण गर्दा २०३ जनामा संक्रमण पुष्टि भएको स्वास्थ्य निर्देशनालय दिपायलले जनाएको छ ।

निर्देशनालयका अनुसार १३८ नमुना पिसिआर गर्दा ६७ जना र ८३० नमुना एन्टिजेन विधिबाट परीक्षण गर्दा १३६ जनामा संक्रमण देखिएको हो ।

यस्तै २४ घण्टामा ५३ जना संक्रमित निको भई डिस्चार्ज भएका छन् । पछिल्लो २४ घण्टामा भारतबाट फर्किएका ४६ जनामा संक्रमण पुष्टि भएको छ ।

निर्देशनालयले दिएको जानकारी अनुसार गौरीफन्टा नाकामा १८ जना, गड्डाचौकी नाकामा २३ जना, झुलाघाट नाकामा ४ जना र पलुघाट नाकामा एकजना गरी ४६ जनामा संक्रमण देखिएको हो ।

यसअघि मङ्गलबार यस प्रदेशमा २४६ जनामा सङ्क्रमण पुष्टि हुँदा १८८ जना निको भएका थिए ।