काठमाडौं । आईसीसी टी–२० विश्व कप क्रिकेटमा पाकिस्तानले दक्षिण अफ्रिकालाई ३३ रनले पराजित गरेको छ ।

दक्षिणी अफ्रिकाले सिड्नी क्रिकेट मैदानमा पाकिस्तानले प्रस्तुत गरेको १८५ रनको लक्ष्य पछ्याइरहँदा पानी परेपछि खेल केहीबेर अवरुद्ध बनेको थियो ।

टस जितेर ब्याटिङमा आएको पाकिस्तानले निर्धारित २० ओभरमा नौ विकेट गुमाएर १८५ रन बनाएको थियो ।

पाकिस्तानले दिएको १८६ रनको लक्ष्य पछ्याइरहँदा ९ ओभरमा पानी परेपछि दक्षिण अफ्रिकाले डीएलएस पद्धतिअनुसार १४ ओभरमा १४२ रनको लक्ष्य पाएको थियो । तर, दक्षिण अफ्रिकाले १४ ओभरमा नौ विकेट गुमाएर १०८ रनमात्र बनाउन सक्यो ।

जितसँगै समूह ‘२’ मा पाकिस्तान चार खेलमा चार अङ्कसहित तेस्रो स्थानमा उक्लिएको छ । पाँच अङ्क रहेको दक्षिण अफ्रिका दोस्रो स्थानमा यथावत् छ ।

पाकिस्तान सेमिफाइनलमा पुग्ने गणितीय सम्भावना कायमै छ । पाकिस्तानले आफ्नो अन्तिम खेलमा आइतवार बङ्गलादेशसँग खेल्नेछ ।