काठमाडौं। लागूऔषध नियन्त्रण ब्यूरो (एनसीबी)ले अवैध लागूऔषध कारोबारमा संलग्न १६ जनालाई पक्राउ गरेको छ ।

लागूऔषधको अवैध कारोबार भइरहेको भन्ने सुचनाका आधारमा लागूऔषध नियन्त्रण व्युरोबाट खटिएको प्रहरी टोलीले १६ जनालाई विभिन्न मितिमा अवैध लागूऔषधसहित पक्राउ गरेको हो ।

एनसीबीले साउन १४ गते काठमाडौं महानगरपालिका १५ बाट भूषण महर्जन, सुभाष घतानी र राजन राईलाई पक्राउ गरेको छ । उनीहरुको साथबाट एनसीबीले ५२ ग्राम ६१० मिलिग्राम लागूऔषध खैरो हेरोईन बरामद गरेको हो ।

ब्यूरोबाट खटिएको प्रहरी टोलीले काठमाडौंको चन्द्रागिरी नगरपालिकाबाट हेटौडा बस्ने उमा शंकर दास र सोहि ठाँउका अब्दुल मिया दर्जीलाई पक्राउ गरेको थियो ।

ब्यूरोले लागूऔषध बुप्रेनोर्फिन नुफिन ५०० एम्पुल, डाईजेपाम ५०० एम्पुल र फेनारगन ५०० एम्पुल गरी जम्मा १५०० एम्पुल बरामद गरेको छ ।

एनसीबीको टोलीले तिलगंगाबाट ईलाम नगरपालिकाका ज्ञान बहादुर राई, बिकास बसेल र कुमार लिम्बुलाई पक्राउ गरेका छ । उनहिरुको साथबाट ३७ ग्राम ५०० मिलिग्राम खैरो हेरोईन बरामद भएको एनसीबीले जनाएको छ ।

विभिन्न स्थानमा भएको प्रहरी कारबाहीमा लागूऔषधको कारोबार गर्ने १६ जनालाई खैरो हेरोईन १३३ ग्राम १५० मिलिग्राम र नियन्त्रित लागु औषध २८८६ एम्पुल सहित बरामद गरी थप अनुसन्धान भईरहेको एनसीबीले जनाएको छ ।