कैलाली । प्रहरीले कैलालीमा खैरो हेरोइनसहित दुई भारतीयलाई पक्राउ गरेको छ ।

जिल्लाको लम्कीचुहा नगरपालिका-९ सोहनपुर भन्ने स्थानमा लागूऔषध (खैरो हेरोइन) कारोबार तथा सेवन भई रहेको भन्ने गोप्य सूचनाको आधारमा इलाका प्रहरी कार्यालय लम्कीबाट खटिएको प्रहरीले टोलीले उनीहरुलाई पक्राउ गरेको हो ।

पक्राउ पर्नेमा लखिनपुर खिरी निघासन तिकुनिया भारत बस्ने वर्ष २४को गुर्वेन्द्र सिंह र वर्ष २१ को कुलदिप सिंह रहेका छन् । कालो रङको युपि ३१ बिवाइ ४९२४ नम्बरको मोटरसाइकल र १० ग्राम खैरो हेरोइनसहित उनीहरुलाई लिइएको जिल्ला प्रहरी कार्यालय कैलालीले जनाएको छ ।

शंकास्पद रुपमा बसिरहेका अवस्थामा दुवै जनाको खानतलासी गर्दा निज कुलदिप सिंहले तल्लो शरीरमा लगाएको नीलो रङको ट्राउजरको बाँया खल्तीमा लुकाई छिपाई कालो रङको प्लाष्टिकको झिल्लीमा पोका पारेको २ थान प्लाष्टिकसहित तौल गर्दा १० ग्राम ६ सय ९० मिलिग्राम र प्लाष्टिक हटाई तौल गर्दा १० ग्राम २ सय ८० मिलिग्राम परिमाण भएको लागूऔषध (खैरो हेरोइन) फेला पारी दुवै जनालाई नियन्त्रणमा लिइएको डीएसपी कुलदिप चन्दले बताए । उनीमाथि प्रहरीले थप अनुसन्धान थालेको छ ।