काठमाडौं । यौन काण्डमा मुछिएका नेपाल प्रहरीका एसएसपी योगबहादुर पालको राजीनामा गृह मन्त्रालयमा अलपत्र परेको छ । तीन साताअघि नै उनले राजीनामा दिएका थिए । कारबाही गरेर मात्र राजीनामा स्वीकृत गर्नुपर्ने दबाब आएपछि गृह मन्त्रालयले राजीनामा स्वीकृति नगरेको हो ।

प्रहरी प्रधान कार्यालयले विभागीय कारबाही प्रक्रिया अघि बढाएपछि उनले राजीनामा दिएर संगठनबाट बाहिरिने विकल्प रोजेका थिए । प्रहरी महानिरीक्षक बसन्तबहादुर कुँवरले पनि उनको निलम्बन फुकुवा गरी राजीनामा स्वीकृतिका लागि गृह मन्त्रालय पठाएका थिए ।

तर, यौन दुर्व्यवहार जस्तो गम्भीर घटनामा मुछिएका अधिकृतलाई कारबाही नगरिएको प्रश्न उठेपछि गृह मन्त्रालयले राजीनामा स्वीकृत नगरेको हो । गृहले निर्णयमा ढिलाइ गर्दा प्रहरी नेतृत्व समस्यामा परेको छ ।

नेपाल प्रहरी प्रदेश कार्यालय, कञ्चनपुरको प्रमुखका रूपमा कार्यरत रहँदा गत १९ जेठमा उनले महिला कर्मचारीलाई दुर्व्यवहार गरेका हुन् । बिदामा जान लागेकी एक महिला हवल्दारलाई निवासमा बोलाएर यौन दुर्व्यवहार गरेका थिए । महिला प्रहरीले सुदूरपश्चिम प्रदेश कार्यालयमा उजुरी दिएपछि छानबिन सुरु भएको थियो ।

सोही दिन उनलाई जिम्मेवारीबाट हटाइएकोमा प्रारम्भिक छानबिनपछि उनलाई गृह मन्त्रालयले निलम्बन गरेको थियो । पछि डिआइजीको नेतृत्वमा उच्चस्तरीय समिति गठन भयो । समितिले स्थलगत रूपमै अध्ययन गरेको थियो ।

सबै पक्षसँगको कुराकानी र प्राविधिक विश्लेषणका आधारमा उनले महिला हवल्दारलाई दुर्व्यवहार गरेको प्रष्ट भएको प्रतिवेदनमा उल्लेख भएपछि उनको ग्रेड घटुवा हुन लागेको थियो ।

बिदामा जान लागेकी कर्मचारीलाई उनले ‘तिमी मलाई मन प¥यो, आज गुड फ्राइडे मनाउनुपर्छ’ भन्दै आफूसँगै बस्न प्रस्ताव गरेका थिए । कार्यालयका अन्य महिला प्रहरीलाई पति विगतमा त्यसैगरी दुर्व्यवहार गरेको छानबिनमा खुलेको छ ।

विगतमा पनि यस्ता घटनामा एसएसपी पालमाथि छानबिन हुँदै आएको थियो । उनी राष्ट्रिय अनुसन्धान विभागबाट राजनीतिक सोर्सफोर्सका आधारमा नेपाल प्रहरीका स्थानान्तरण भएका अधिकृत हुन् ।