काठमाडौं । साविक विजेता काठमाडौं रेजर्स दोस्रो संस्करणको नेपाल सुपर लिग (एनएसएल) को एलिमिनेटरबाटै बाहिरिएको छ ।

मङ्गलवार त्रिपुरेश्वरको दशरथ रङ्गशालामा ललितपुर सिटी एफसीसँगको खेलमा काठमाडौं ३–० गोलले पराजित भएको हो ।

ललितपुरका इमोह इजेकिलले खेलको ३६ औँ र ५२ औँ तथा पाबा केबेले ४४ औँ मिनेटमा गोल गरे । यो जितसँगै ललितपुर दोस्रो क्वालिफायरमा पुगेको छ ।

अब ललितपुरले फाइनल प्रवेशका लागि दोस्रो क्वालिफायरमा पर्सि बिहीवार पोखरा थन्डर्ससँग खेल्नेछ । फाइनल खेल आउँदो शनिवार हुनेछ ।