काठमाडौँ । दक्षिण अफ्रिकामा जारी यू–१९ एकदिवसीय विश्वकप क्रिकेटको सेमिफाइनलमा भारतले दक्षिण अफ्रिकालाई पराजित गरेको छ ।

मंगलबार भएको खेलमा भारतले दक्षिण अफ्रिकालाई दुई विकेटले पराजित गरेको हो । दक्षिण अफ्रिकाले दिएको २४४ रनको लक्ष्य भारतीय टोलीले आठ विकेट गुमाएर पूरा गर्‍यो ।

भारतका लागि सचिन धसले सर्वाधिक ९६ रन र कप्तान उदय सहारनले ८१ रन बनाए । दुवैले पाँचौँ विकेटका लागि कीर्तिमान १७१ रनको साझेदारी गरे। यो साझेदारी यस्तो समयमा भयो, जब भारतले ३२ रनमा चार विकेट गुमाएको थियो।

यसअघि दक्षिण अफ्रिकाले जुआन ड्रे प्रिटोरियसको ७६ र रिचर्ड स्लेट्सवेनको ६४ रनको सहयोगमा निर्धारित ५० ओभरमा सात विकेट गुमाएर २४४ रन बनाएको थियो । भारतका लागि राज लाम्बानीले ३ तथा मुशिर खानले २ विकेट लिए ।

२४५ रनको लक्ष्य पछ्याउन उत्रिएको भारतीय टोलीको सुरुवात निकै खराब रह्यो । तर कप्तान उदय सहारन र सचिन धसको ब्याटिङका ​​कारण भारतले जित निकाल्यो ।

दोस्रो सेमिफाइनलमा अष्ट्रेलिया र पाकिस्तानबीच बिहीबार प्रतिस्पर्धा हुनेछ । जसको विजेताले फाइनलमा भारतसँग आइतबार खेल्नेछ ।