काठमाडौं । पूर्वराष्ट्रपति तथा नेकपा एमाले नेतृ विद्यादेवी भण्डारीले आफूले विधिपूर्वक पार्टीको सदस्यता नवीकरण गरेको बताएकी छन् ।
शुक्रबार काठमाडौंमा आयोजित पत्रकार सम्मेलनमा बोल्दै उनले सो कुरा बताएकी हुन् ।
“पार्टीको सदस्यता विधिपूर्वक नवीकरण गरेँ,” भण्डारीले भनिन्, “मैले सार्वजनिक नगरेकै अवस्थामा यो विषय सञ्चारमाध्यममा बाहिरियो। चुपचाप बस्नु उपयुक्त थिएन। त्यसैले अब खुलाएर भन्न चाहन्छु— म एमालेमा आवद्ध भएरै राजनीति अघि बढाउँदैछु।”
उनले जननेता मदन भण्डारीको ७४ औं जन्मजयन्तीको अवसर पारेर पार्टी सदस्यता नवीकरण गरेको जानकारी दिँदै त्यो क्षण आफूका लागि भावनात्मक र निर्णायक रहेको बताइन् ।