काठमाडौं । विपक्षी गठबन्धनको विद्यार्थी संगठनले आज पनि प्रधानमन्त्री केपी शर्मा ओलीको पुत्ला दहन गरेका छन् । काठमाडौंको भृकुटीमण्डपस्थित प्रदर्शनीमार्गमा सरकारविरुद्ध प्रदर्शन गर्दै ५ वटा विद्यार्थी संगठनले प्रधानमन्त्रीको पुत्ला दहन गरेका हुन् ।

नेपाली कांग्रेस, नेकपा माओवादी केन्द्र, नेकपा एमालेको माधवकुमार नेपाल समूह, जनता समाजवादी पार्टीको उपेन्द्र यादव समूह र राष्ट्रिय जनमोर्चाको विद्यार्थी संगठनले पुत्ला दहन सहित प्रदर्शन गरेको हो ।

प्रदर्शनका क्रममा केही बेर प्रहरी र प्रदर्शनकारीबीच धकेलाधकेल भएको थियो । प्रधानमन्त्री केपी शर्मा ओलीले प्रतिनिधिसभा विघटन गरेको विरोधमा विपक्षी गठबन्धनले सडक आन्दोलन सुरु गरेको छ ।

हिजो पनि विद्यार्थी संगठनले काठमाडौंको बानेश्वरमा राष्ट्रपति र प्रधानमन्त्रीको पुत्ला दहन गरेको थियो ।