काठमाडौं । महानगरीय प्रहरी अपराध महाशाखाले अवैध रुपमा पटका, आतिसबाजी जन्य पदार्थको भण्डारण गर्ने कार्यमा संलग्‍न रहेको आरोपमा एक जनालाई पक्राउ गरेको छ ।

पक्राउ पर्नेमा गढिमाई न.पा. ३, गञ्जभवानीपुर, बारा घर भइ हाल ललितपुर कुपण्डोल बस्दै आएका ३० वर्षीय उमेश कुमार जैसवाल रहेका छन् ।

जैसवालले विभिन्‍न मितिमा उपत्यका बाहिरबाट गैरकानुनी रुपमा लुकाइ-छिपाइ पटाका, भुइचम्पालगायतका आतिसवाजीजन्‍य विष्फोटक पदार्थहरु विजया दशमी तथा दीपावलीलाई लक्षित गरी भण्डारण गरेको महाशाखाको दाबी छ ।

महाशाखाका अनुसार उनको साथबाट १४९४ के.जी. (अन्दाजी मुल्य रु. २० लाख) बराबरको विस्फोटक पदार्थ बरामद गरिएको छ।

पक्राउ परेका उनीमाथि मुलुकी अपराध संहिता २०७४ को परिच्छेद ७ को विस्फोटक पदार्थ सम्बन्धित कसुर अन्तर्गतको मुद्दामा आवश्‍यक कारबाहीको लागि महानगरीय प्रहरी परिसर टेकु पठाइएको अपराध महाशाखाले जनाएको छ ।