काठमाडौँ । आगामी वैशाखमै स्थानीय तहको चुनाव गर्न सत्ता गठबन्धनमा आवद्द दलहरु सहमत भएका छन् ।

मंगलबार बिहान प्रधानमन्त्री निवास बालुवाटारमा बसेको उच्चस्तरीय राजनीतिक समन्वय समितिको बैठक मा स्थानीय निर्वाचनबारे छलफल भएको थियो । जसमा सहभागी सबै दलका नेताहरूले संविधानअनुसार समयमै स्थानीय चुनाव गर्नुपर्नेमा सहमत भएका हुन् ।

स्रोतका अनुसार अब अर्को बैठक आगामी बिहीबार पुन बस्ने छ, जुन बैठकले बाँकी थप निर्णय गर्ने छ । साथै, बैठकमा कोरोना नियन्त्रणलगायतका विषयमा पनि छलफल भएको छ ।

बैठकमा प्रधानमन्त्री शेरबहादुर देउवा, माओवादी केन्द्रका अध्यक्ष पुष्पकमल दाहाल ‘प्रचण्ड’, जनता समाजवादी पार्टीका अध्यक्ष डा. बाबुराम भट्टराई, नेपाली कांग्रेसका नेता रामचन्द्र पौडेललगायतका नेताहरुको उपस्थिति रहेको थियो।