विराटनगर । मोरङमा महिलामाथि बलात्कार गरेको आरोपमा एकजना पक्राउ परेका छन् । जिल्लाको धनपालथान गाउँपालिका ५ ववियाका ४५ वर्षीय कालुराम खवासलाई प्रहरीले बलात्कार आरोपमा पक्राउ गरेको हो ।

इलाका प्रहरी कार्यालय रंगेलीका प्रहरी निरीक्षक अनमोल खड्का नेतृत्वको टोलीले उनलाई पक्राउ गरेको हो । प्रहरीका अनुसार खवास धनपालथान ५ मा रहेको एकतारा आधारभूत विद्यालयका प्रधानाध्यापक हुन् ।

उनीमाथि २९ वर्षीया महिलालाई घरमै पुगेर बलात्कार गरेको आरोप छ । मोरङ प्रहरीका प्रवक्ता डीएसपी दीपक श्रेष्ठले गत पुस १२ गते राति महिलाको घरमै पुगेर बलात्कार गरेको किटानी जाहेरीका आधारमा खवासलाई पक्राउ गरिएको जानकारी दिए ।

प्रअ खवासविरुद्ध जबरजस्ती करणी मुद्दा चलाउन अदालतबाट बिहीबार म्याद थप गरेर घटनाको बाँकी अनुसन्धान अघि बढाइएको उनले बताए ।