विराटनगर । खेलकुद क्षेत्रमा कुनै पनि काम गर्न नसकेको भन्दै प्रदेश–१ सरकारले प्रदेश खेलकुद बोर्डको उपाध्यक्ष बाबा मेन्याङ्बो र सदस्य सचिव कृष्ण बस्नेत ‘पर्शुराम’लाई बर्खास्त गरेको छ ।

सरकारलाई असहयोग गरेको र खेलकुद क्षेत्रमा कुनै काम नगरेको भन्दै उनीहरूलाई प्रदेश सरकारले हटाएको हो ।

एमालेका तत्कालीन मुख्यमन्त्री भीम आचार्यले असोज २४ गते प्रदेश खेलकुद बोर्डको उपाध्यक्ष, सदस्य सचिव र सदस्यहरू नियुक्त गरेका थिए ।

पर्शुराम बस्नेतलाई सदस्य सचिव बन्ने योग्यता नपुग्ने भन्दै प्रदेश १ सरकारले स्पष्टीकरण सोधेको थियो । बस्नेतले चित्तबुझ्दो स्पष्टीकरण दिन नसकेपछि सरकारले बस्नेतलाई पदमुक्त गरेको हो।

प्रदेश खेलकुद बोर्डको सदस्य सचिव बन्न कम्तीमा १० वर्ष खेलकुद क्षेत्रमा योगदान दिएको र असल चालचलन भएको हुनुपर्ने कानूनी प्रावधान छ ।

एमाले अध्यक्ष केपी शर्मा ओलीसँग निकट सम्बन्ध बनाएका पर्शुराम बस्नेत ओलीका ‘राइट ह्याण्ड’ मानिने महेश बस्नेतसँग भने रुष्ट छन् । पारिवारिक झमेलामा फसेका उनीहरुको सम्बन्ध अहिले पानी बाराबार जस्तै रहेको भक्तपुरकै एक एमाले नेताले बताए । पर्शुरामकै कारण ओली सरकारको पालामा महेश बस्नेतले मन्त्री पद पाउन नसकेको चर्चा पनि चलेको थियो । पर्शुरामले आफ्नो पारिवारिक सम्बन्ध विगारेको आरोप महेश बस्नेतमाथि लगाउँदै आएका छन् । तर, त्यसलाई पुष्टि गर्ने आधार भने अहिलेसम्म बाहिर आएका छैनन् ।

एमाले निकटका गुण्डा नाइकेको छवी बनाएका पर्शुराम पछिल्लो समय भने राजनीतिमा सक्रिय हुन थालेका हुन् । उनी विभिन्न अपराधका अभियोगमा पक्राउ गरेर छुटेका व्यक्ति हुन् । सम्पत्ति शुद्धीकरणमा मुद्धा खेपेका बस्नेतले पछि सफाइ पाएका हुन् ।