काठमाडौं । बेलायतको सत्तारुढ कन्जरभेटिभ पार्टीका नवनियुक्त नेता ऋषि सुनकले बकिङ्घम दरबारमा राजा चाल्स तृतीयसँग भेटपछि औपचारिक रूपमा प्रधानमन्त्री बनेका छन् ।

बेलायतको प्रधानमन्त्री आवास टेन डाउनिङ स्ट्रिटबाट सुनकले प्रधानमन्त्रीका रूपमा देशलाई पहिलो सम्बोधन गरेका हुन् । सम्बोधनको सुरुवातमा सुनकले आफूले राजालाई भेट्न आएको र उनले आफूलाई नयाँ सरकार बनाउन आग्रह गरेको सुनाएका थिए ।

सम्बोधनका क्रममा सुनकले भने, ‘तपाईँहरूलाई थाहा छ, हाम्रो अर्थतन्त्र अहिले कठिन चरणबाट गुज्रिरहेको छ । कोभिडका कारण पहिलेदेखि नै समस्या थियो, पुटिनले युक्रेनमा आक्रमण गरेर स्थितिमा थप खराब बनाइदिए ।

पूर्वप्रधानमन्त्री लिज ट्रस स्थिति सुधार्न चाहन्थिन्, तर उनले यसतर्फ अथक प्रयास पनि गरिन् तर गल्ती भए । अब हामी तिनलाई सुधार्नेछौँ ।’

सुनकले ब्रिटिस राजासँग भेट्नुअघि पूर्वप्रधानमन्त्री लिज ट्रसले राजदरबार पुगेर राजा चाल्र्स तृतीयलाई भेटेर राजीनामा बुझाएकी थिइन् ।