धनुषा । धनुषाको बटेश्वरस्थित आइतबार राति बञ्चरो प्रहार गरेर पत्नीको हत्या गरेको आरोपमा एक जना पक्राउ परेका छन् ।
बटेश्वर गाउँपालिका–५ शान्तिपुरका वीरेन्द्र यादव पत्नी २७ वर्षीया रितादेवी यादवको हत्याको आरोपमा पक्राउ परेका हुन् ।
बन्चरो प्रहारपछि घाइते भएकी रितालाई उपचारका लागि श्रीमान वीरेन्द्रले नै जनकपुरस्थित काव्या अस्पतालमा पुर्याएका थिए । सख्त घाइते बनेकी उनको उपचारको क्रममा मृत्यु भएको हो ।
प्रहरी अनुसन्धानका आधारमा श्रीमान वीरेन्द्रले नै बञ्चरो प्रहार गरी हत्या गरेको खुलेको धनुषा प्रहरीका प्रवक्ता डीएसपी प्रदीपबहादुर क्षेत्रीले जानकारी दिए ।
आइतबार राति ११ बजे घरमा सुतिरहेकी रितामाथि सुतेकै ओछ्यानमा आक्रमण गरेको प्रहरी अनुसन्धानमा खुलेको छ । वीरेन्द्र भने घटनाको बेला आफू अर्को कोठामा सुतेको प्रहरीलाई बयान दिएका थिए ।
स्थानीयका अनुसार वीरेन्द्रले श्रीमतिलाई पहिले पनि कुटपिट तथा यातना दिने गरेका थिए ।
वीरेन्द्रलाई नियन्त्रणमा लिई थप अनुसन्धान शुरु गरिएको प्रहरीले जनाएको छ ।
Leave a Reply