Jun 04 2026 | २०८३, जेठ २१ गते
04 Jun 2026 | बिहिवार, जेठ २१ गते २०८३
बिहिवार, जेठ २१ गते २०८३
Jun 04 2026 | २०८३, जेठ २१ गते
04 Jun 2026 | बिहिवार, जेठ २१ गते २०८३
मंगलवार , पौष १६, २०८१
कैलाली । कैलालीमा लोक सांस्कृतिक तथा डेउडा महोत्सव आयोजना हुने भएको छ ।
मङ्गलवार धनगढीमा आयोजित पत्रकार सम्मेलनमा सुदूरपश्चिम प्रज्ञा प्रतिष्ठान र सुदूरपश्चिम लोक सांस्कृतिक समाज फूलबारीको संयुक्त आयोजनामा पुस २३ देखि २७ गतेसम्म महोत्सव आयोजना हुने जानकारी दिइएको हो ।
संस्कार र संस्कृतिको संरक्षण गर्ने उद्देश्यले महोत्सव आयोजना गर्न लागिएको आजोजकले जनाएको छ । सुदूरपश्चिम लोक सांस्कृतिक समाजका अध्यक्ष तिलकबहादुर ओलीका अनुसार महोत्सवमा प्रदेशस्तरीय डेउडा कार्यक्रम, पञ्चेबाजा, सखिया, झुम्रा, लोकदोहोरी, मारुनी, तामाङसेलो प्रतियोगिता गरिने छ ।
महोत्सवमा चर्चित राष्ट्रिय डेउडा कलाकारहरूको समेत प्रस्तुति रहनेछ । महोत्सवमा खुल्ला डेउडा प्रतियोगिता हुने र सुदूरपश्चिमका ९ जिल्ला सहित अन्य प्रदेशका प्रतियोगी टोलीको सहभागिता हुने आयोजकले जनाएको छ।
डेउडा प्रतियोगिताका लागि पुस १८ देखि २३ गतेसम्म समूह दर्ता गर्न सकिने छ । डेउडा प्रतियोगिताका सहभागी टोलीहरूलाई पुरस्कारको समेत व्यवस्था गरिने आयोजकले जनाएको छ।
महोत्सवमा पञ्चेबाजा, भुवा, मारुनी, सखिया, झुम्रा नाच र तामाङसेलो नाचका उत्कृष्ट टोलीलाई सम्मान गरिने अध्यक्ष ओलीले बताए । डेउडा समूह पुस १८ देखि २३ गते बेलुका ४ बजेसम्म हुनेछ । समूह दर्ताका लागि ९८४७३४४११९ मा सम्पर्क गर्न आग्रह गरिएको छ ।
दर्ता भएका समूहको पुस २३ गते बिहान १० बजे गोलाप्रथाबाट खेल तालिका सार्वजनिक गरिने आयोजकले जनाएको छ । डेउडा खेल पुस २३ गतेदेखि नै खेलाइने र खेलाडीहरुले पुस २३ गते बिहान १० बजेभित्र पुगिसक्नु पर्नेछ ।
डेउडा तथा लोक दोहोरीमा सहभागीमध्ये सर्वोत्कृष्ट टिम एवं स्रष्टाको उचित सम्मान तथा पुरस्कारको पनि व्यवस्था रहेको आयोजकले जनाएको छ । सो महोत्सवको उद्घाटन सुदूरपश्चिम प्रदेशका मुख्यमन्त्री तथा सुदूरपश्चिम प्रज्ञा प्रतिष्ठानका कुलपति कमलबहादुर शाहले गर्नेछन् ।
महोत्सवमा प्रवेश निःशुल्क गरिएको छ । साथै महोत्सवलाई मध्यनजर गर्दै यात्रुलाई बिहान तथा साँझ पनि आवतजावतमा सहज होस भन्दै धनगढीदेखि फूलवारी बस सेवा सुचारु रहने बताइएको छ ।
© 2026 All right reserved to onlinenepal.com
Design & Developed By
