काठमाडौं । गण्डकी प्रदेशको विपद् व्यवस्थापन गुल्म बागलुङमा कार्यरत नायव निरीक्षक रूपनारायण महतो घुस लिँदा लिँदै पक्राउ परेका छन् ।

अख्तियार दुरुपयोग अनुसन्धान आयोग पोखराबाट खटिएको टोलीले महतोलाई ३८ हजार घुससहित रङ्गे हात पक्राउ गरेको हो ।

म्याग्दी जिल्ला बस्ने धर्म कुमारी क्षेत्रीसँग पाँचथर स्थायी घर भई हाल बागलुङ्मा मेकानिक्सको काम गर्दै आएका रमेश लिम्बुको लेनदेनको विषयमा परेको विवाद मिलाई दिन्छु भन्दै सई महतोले घुस मागेका थिए ।

सेवाग्राही रमेश लिम्बुसँग नगद घुस लिइरहेको अवस्थामा उनलाई आयोगको टोलीले बागलुङ्को वडा नम्बर २ स्थित विपद् व्यवस्थापन गुल्म नजिकैबाट साँझ करिब ६ः२५ बजे पक्राउ गरेको हो ।