बाजुरा । बाजुराको बुढीगंगा नगरपालिकामा जनप्रतिनिधि चयनका लागि मतदान जारी छ । बुढीगंगा नगरपालिकाको नेतृत्व चयनका लागि बिहान ७ बजेदेखि चुनाव भइरहेको हो ।
नगरपालिकाका १० वटै वडाका १९ मतदान केन्द्रमा मतदान भइरहेको निर्वाचन आयोगले जनाएको छ । वैशाख ३० गतेको निर्वाचनमा नेपाली कांग्रेस र नेकपा एमाले दुवै पक्षबाट धाँधली भएको भन्दै निर्वाचन आयोगले पालिकाभरिकै निर्वाचन बदर गरेको थियो ।
त्यसपछि एमालेले मतगणना गर्नुपर्ने अडान राखेको थियो। सर्वोच्च र उच्च अदालतमा मुद्दा दायर गरेको थियो। तर, विभिन्न दलका स्थानीय नेताहरुले फेरि निर्वाचन गर्ने आयोगको निर्णय कार्यान्वयन गर्ने सहमति जुटाएका हुन्। जस अनुसार आज पुनः निर्वाचन गर्ने सहमति भएको थियो ।
निर्वाचन अधिकृतको कार्यालयका अनुसार पुनः हुने निर्वाचनका लागि शान्तिपूर्णरूपमा सम्पन्न गर्न आवश्यकता अनुसार सुरक्षाकर्मी तैनाथ गरिएको बताएका छन् । निर्वाचन गराउन ९५ कर्मचारी खटिएका छन् । सुरक्षाका लागि नेपाल प्रहरी र सशस्त्र प्रहरीबाट प्रहरी निरीक्षकको नेतृत्वको टोली खटाइएको छ।
Leave a Reply