काठमाडौं । पूर्वप्रधानमन्त्री समेत रहेका नेकपा एमालेका अध्यक्ष केपी शर्मा ओलीले आपराधिक तत्त्वहरूले आफूमाथि लगाएका आरोप जनताले नपत्याउने दावी गरेको छ । 

झापाको गौरीगञ्जस्थित देवीगञ्जमा आज स्थानीय मतदातासँग छलफल गर्दै ओलीले भदौ २३ र २४ गते जेनजीहरूको आन्दोलनमा आपराधिक तत्त्वहरू घुसेर विध्वंस मच्चाएको दाबी गरे।

उनले भने–‘जेनजीहरूको आन्दोलनमा आपराधिक तत्त्वहरू घुसेर विध्वंस मच्चाए । तिनै तत्त्वहरूले उल्टै आफूमाथि गोली चलाएर मान्छे मारेको आरोप लगाए । प्रधानमन्त्रीको हैसियतमा आफूले कसैलाई पनि गोली चलाउन आदेश दिएको छैन । संसद् भवन र सिंहदरबार जलाउने कोसिस गरेर प्रहरीलाई गोली चलाउने वातावरण अपराधीहरूले नै बनाए ।’

मुलुकको विकासका लागि एमालेले सबैभन्दा धेरै काम गरेको दाबी गर्दै उनले भने–‘गोबर र गुइँठा बाल्नुपर्ने अवस्थाबाट विकास गरेर बिजुली बाल्ने अवस्थामा पुग्नुपर्छ भन्दा केहीले कुरा तोडमोड गरे । जसमा मेरो घोर आपत्ति छ ।’

उनले नेपालमा ग्यास उत्खनन भइसकेको भन्दै अब त्यसलाई सदुपयोग गरेर घर–घरमा पाइपबाट वितरण गर्नुपर्ने कुरामा जोड दिए। घर–घरमा ग्यासको लाइन पुर्याउने उनको विवादित अभिव्यक्तिलाई अहिले पनि ओलीले दोहोर्याउँदै आएका छन् । 

केपी शर्मा ओलीले पहिलो पटक प्रधानमन्त्री बनेको तीन महिना पुगेपछि २०७२ पुस २४ गते काठमाडौंमा आयोजित एक कार्यक्रममा भनेका थिए–‘अब ग्यासको बुलेट कहिले आउला भनेर हेर्ने दिन गए । अलिकति समय दिनुस्, सिलिण्डर युग अन्त्य गर्छु, हरेक घरको चूलोमा ग्याँसको पाइप जोडिदिन्छु ।’

ओलीले भनेको यही कुरालाई लिएर अहिले पनि उनीप्रति व्यंग्य भइरहेकै छ । त्यसबेलै निकै आलोचना भएको थियो । किनकि त्यसबेला भारतले नाकाबन्दी लगाएको थियो र एउटा ग्याँस सिलिण्डर लिन सर्वसाधारणले ४ घण्टासम्म लाइनमा बस्नुपर्ने बाध्यता थियो । 

तर, ओलीको पहिलो कार्यकालमा ग्याँस पाइप घर घरमा पुग्न सकेन । दोस्रो पटक प्रधानमन्त्री भएपछि पनि उनले आफूले बोलेको वाचा पूरा गर्न नसकेको आरोप खेपे । 

२०७४ सालको निर्वाचनमा बाम गठबन्धनबाट ओली नेतृत्वको एमाले सबैभन्दा ठूलो पार्टी बन्यो । त्यतिबेला घोषणा पत्रमा प्रतिव्यक्ति आय ५ हजार डलर पुर्याउने, चिनियाँ चुच्चे रेल, हनुमाननगर–कलकत्ता पानीजहाज, काठमाडौंमा मोनो र मेट्रो रेलजस्ता दर्जनौँ पपुलिष्ट प्रतिबद्धता गरियो । 

यी सबै गफमै सिमित भएको अवस्थामा ओली अझै पनि घर–घरमा ग्यासको पाइप पुर्याउने कुरा भने दोहोर्याइ रहेका छन् ।