काठमाडौं । काठमाडौंको ठमेलमा रहेको क्लब फरेनहाइटमा इन्डियन–अमेरिकन र्‍यापर ‘द राजा कुमारी’को भव्य कन्सर्ट आयोजना हुने भएको छ ।

डिसेम्बर ४ मा हुने कन्सर्टमा सहभागी हुन राजा कुमारी डिसेम्बर ३ मा दिल्ली हुँदै नेपाल आउने क्लव फोरेनहाइटका सञ्चालक सोनाम शेर्पाले अनलाईन नेपाललाई जानकारी दिए ।

अमेरिकामा विज खलिफा जस्ता चर्चित र्‍यापरसँग स्टेज शेयर गरिसकेकी राजा कुमारी ग्रामी अवार्डमा समेत नोमिनेसनमा परिसकेकी छन् ।

राजा कुमारीलाई नेपाल ल्याउँदा विश्वमा नेपाल कोरोनाको कहरबाट मुक्त हुँदै गएको सन्देश पुग्ने र यहाँको व्यापार व्यवसायलाई समेत फाइदा पुग्ने सञ्चालक शेर्पाको भनाई छ ।

कन्सर्ट हेर्नका लागि दर्शकले १ हजार र २ हजारका टिकट खरिद गर्न सक्ने क्लवले जनाएको छ । नेपालमा समेत राजा कुमारीका युवा फ्यान धेरै भएकाले उनलाई नेपाल ल्याउन लागिएको क्लब फरेनहाइटका सीइओ मिलन श्रेष्ठले बताए ।

ठमेलको पर्यटन क्षेत्र विस्तारका लागि पनि यो कन्सर्ट आयोेजना गर्न लागेको श्रेष्ठको भनाई छ । क्लब फरेनहाइटले यसअघि भारतका चर्चित कलाकारहरु आदित्यनारायण झा, टोनी कक्कड लगायतले प्रस्तुति दिइसकेका छन् ।

लामो समयदेखिको कोरोना कहरका कारण घरमै खुम्चिएका युवा पुस्ताका लागि यस्ता कन्सर्ट फलदायी सावित हुन शेर्पाको दावी छ ।