काठमाडौं । आरोही कामी रिता शेर्पा २६औँ पटक ८ हजार ८४८.८६ मिटर अग्लो सगरमाथा आरोहण गर्न सफल भएका छन् । २६औँ पटक सगरमाथा चढ्ने उनी एकमात्र आरोही बन्न सफल भएका छन् ।

सगरमाथाको चुचुरोसम्म बाटो बनाउने र डोरी टाँग्ने क्रममा सेभेन समिट ट्रेकिङ कम्पनीको टोलीका बाँकी १० जना सदस्यसहित कामी रिता पनि सगरमाथाको चुचुरोमा पुगेका हुन् ।

शेर्पाले आजभन्दा २८ वर्षअघि अर्थात सन् १९९४ मा पहिलो पटक सगरमाथाको आरोहण गरेका थिए । २८ वर्षको अवधिमा २६ पल्ट सगरमाथा चढेका कामी रिताले थुप्रै कीर्तिमान बनाएका छन् ।

शेर्पाले दुई पटक केटू हिमाल, एक पटक ल्होत्से, तीन पटक मनास्लु र आठ पटक चोयु हिमाल आरोहण समेत गरेका छन् ।