दार्चुला । बलात्कारपछि भाउजूलाई जिउँदै जलाउने व्यक्तिलाई पुर्पक्षका लागि थुनामा पठाउन जिल्ला अदालत दार्चुलाले आदेश दिएको छ ।

जिल्ला न्यायाधीश कोमलप्रसाद आचार्यको इजलासले शैल्यशिखर नगरपालिका १ बारिलका भोजराज खडायतलाई पुर्पक्षका लागि थुनामा पठाउने आदेश दिएको हो ।

दुई दिनअघि खडायतलाई आजीवन कारावासको सजाय माग गर्दै जिल्ला सरकारी वकिल कार्यालयले अदालतमा मुद्दा दायर गरेको थियो। उनीविरुद्ध कर्तव्य ज्यान, जबरजस्ती करणी र डाँकासम्बन्धी कसुरमा मुद्दा दर्ता भएको हो ।

यस्तै पीडित परिवारलाई क्षतिपूर्ति दिलाउनु पर्ने पनि अभियोजन पत्रमा उल्लेख छ । जबरजस्ती करणी र डाँका मुद्दामा पनि थप कैद सजाय तथा जरिवाना र क्षतिपूर्तिको माग गरिएको छ ।

गत जेठ २५ गते बिहान २ बजेतिर भोजराज खडायतले जरुरी काम छ भन्दै अनिभा खडायतलाई घरबाट करिब ५० मिटर टाढा रहेको उखुबारीमा लगेर जबरजस्ती करणी गरेको र त्यसक्रममा अनिभाले प्रतिकार गरेपछि ढुंगाले टाउकोमा हानेर घाइते बनाएको अभियोजन पत्रमा उल्लेख छ ।

उनलाई प्रहरीले भाग्दै गरेको अवस्थामा घटनाको भोलिपल्ट बैतडीबाट पक्राउ गरेको थियो ।