काठमाडौं । नेपाली कांग्रेसको केन्द्रीय कार्यसमितिको बैठक यथाशीघ्र बोलाउन माग गर्दै एक केन्द्रीय सदस्यले निवेदन दिएका छन् ।

केन्द्रीय सदस्य मधु आचार्यले ११ महिनादेखि बैठक नबसेको भन्दै सोमबार सभापति शेरबहादुर देउवासमक्ष लिखित माग गरेका हुन् ।

आचार्यको पत्रमा चुनावको समिक्षा गर्न अहिलेसम्म बैठक नबसेको तथा कार्यकर्ताले उठाएका सयौं प्रश्नको जवाफ नदिइएको भन्दै विधान बमोजिम बैठक बोलाउन माग गरिएको छ ।

उनको निवेदन पार्टी केन्द्रीय कार्यालयमा दर्ता भएको छ । पार्टीको विधानले हरेक दुई महिनामा केन्द्रीय कार्यसमिति बैठक बस्नुपर्ने व्यवस्था गरे पनि गत साउनयता बैठक बस्न सकेको छैन् ।