काठमाडौं । चर्चित गजलकार एवं गीतकार प्रकट पंगेनी ‘शिव’ को निधन भएको छ।

स्वास्थ्यमा गम्भीर समस्या देखिएपछि पोखराको मणिपाल शिक्षण अस्पताल भर्ना भएका पंगेनीको उपचारका क्रममा मंगलबार दिउँसो निधन भएको हो ।

६८ वर्षीय पंगेनी निमोनिया लगायतका समस्याबाट पीडित थिए ।

पोखरामा रहेर गजल, गीत, कविता लगायत साहित्यका विविध विधामा कलम चलाएका प्रकट श्रृङ्गारिक गजलबाट चर्चा कमाएका थिए।

उनका करिब ५ दर्जन गीत रेकर्ड भएका छन्। उनका ‘यो मन कतै अल्झेको छ’ र ‘जुनको चिठी जुनाललाई’ गीत संग्रह प्रकाशित छन्।

यस्तै, प्रणयवेदका ऋचाहरू गजल संग्रह र अक्षरभरी अक्षता कविता संग्रह पनि प्रकाशित छन्।

प्रकटका कविता, गजलका किताब प्रकाशित छन् भने ‘तगारो छेउ आएर पनि आँगनी टेकिनौ’जस्ता गीत चर्चित छन् ।

३० को दशकबाट साहित्य सिर्जनामा क्रियाशील पंगेनी पछिल्लो समय जन्मगाउँ रूपा गाउँपालिकामै बसेर फार्म र कटेज सञ्चालनको तयारी गरिरहेका थिए ।

अस्पतालका अनुसार प्रकटलाई निमोनिया र जण्डिसको समस्या देखिएको थियो।