काठमाडौं। अख्तियार दुरुपयोग अनुसन्धान आयोगका प्रमुख आयुक्त प्रेम कुमार राईसहितका हाइप्रोफाइललाई धम्क्याउने प्रकाश पाठकले नागरिक उड्डयन प्राधिकरण (क्यान)का तत्कालिन महानिर्देशक प्रदीप अधिकारीलाई चार महिना अघि नै ज्यान मार्ने धम्की दिएको खुलेको छ । 

कतिपय मिडियाहरुले प्रकाश पाठकसँग प्रदीप अधिकारीको ‘कनेक्सन’ देखिएको भन्दै समाचार बनाए पनि यथार्थमा भने त्यस्तो नभई उनै अधिकारीलाई नै ज्यान मार्ने धम्की आएको खुलेको हो । 

पाठक प्रमुख रहेको ‘एस्ट्रिमिस्ट ग्रुप अफ नेपाल’ (ईजीएन) ले २५ अक्टोबर २०२५ मा नै पत्र पठाएर अधिकारीलाई ज्यान मार्ने धम्की दिएको थियो । पाठकको हस्ताक्षर रहेको उक्त पत्र क्यानको आधिकारिक इमेलमा आएपछि क्यानले नै प्रहरी गुहारेको थियो ।

क्यानले २०८२/०७/०९ मा काठमाडौं उपत्यका अपराध अनुसन्धान कार्यालयलाई पत्र नै लेखेर पाठकको धम्कीबारे जानकारी गराएको थियो । 
क्यानले उक्त पत्र मार्फत महानिर्देशकको व्यक्तिगत सुरक्षाको सम्बन्धमा आवश्यक व्यवस्था गरिदिनसमेत आग्रह गरेको थियो । 

यद्यपी अहिले आएर महानिर्देशक अधिकारीको पाठकसँग कनेक्सन भनेर गरिएको प्रचार ‘फेक’ भएको पुष्टि भएको छ । 

पाठक अहिले काठमाडौं प्रहरीको हिरासतमा छन् । उनलाई माघ २८ गते अन्तर्राष्ट्रिय प्रहरी सङ्गठन (इन्टरपोल)को सहयोगमा प्रहरीले पक्राउ गरेर नेपाल ल्याइएको थियो । काभ्रे घर भएका पाठकले सामाजिक सञ्जाल (फेसबुक) मार्फत १० जना हाइप्रोफाइललाई धम्की दिएका थिए ।

प्रहरीले उनीविरुद्ध आपराधिक लाभ, आपराधिक षड्यन्त्र गर्न नहुने कसुर र विद्युतीय (इलेक्ट्रोनिक) कारोबार ऐन अन्तर्गतको कसुरमा म्याद लिएर अनुसन्धान गरिरहेको छ । 

पाठकले सामाजिक सञ्जालमा भिडियो पोष्ट गरेर लोकमान सिंह कार्की, गोपाल बहादुर खड्का, रमेश लेखक, बालकृष्ण खाँण, आरजु राणा, ओमविक्रम राणा, हेमबहादुर गुरुङ, रमेश चन्द ठकुरी र दुर्गा प्रसाईँलाई ज्यान मार्ने धम्की दिएका थिए ।

यता, अधिकारी पनि अहिले भ्रष्टाचार मुद्दामा पुर्पक्षको लागि डिल्लीबजार कारागार कार्यालयमा छन् । अख्तियारले भक्तपुरको नलिन्चोकमा हेलिपोर्ट निर्माणमा भएको अनियमितामा अधिकारीको पनि संलग्न रहेको भन्दै मुद्दा दायर गरेको थियो । 

२०८० सालमा मुलुक छाडेर विदेशमा बस्दै आएका पाठक पछिल्लो समय विभिन्न देश घुमेर फिलिपिन्स पुगेका हुन् । २०७७ साल तिर पाठकले भिजिट भिसामा नेपालीहरूलाई विदेश पठाउने काम गरेका थिए । पछिल्लो समय विभिन्न व्यक्तिलाई धम्की दिंदै उनले पैसा असुल्दै आएको पनि खुलेको छ । 

पाठकविरुद्ध वैदेशिक रोजगार ठगीमा अहिलेपनि दुईवटा मुद्दा चलिरहेको भेटिएको छ । उनले न्युजिल्याण्ड र रसिया पठाउँछु भनेर रकम ठगी गरेको आरोप छ ।