एजेन्सी । कोलम्बियाली मूलकी एक मोडलले जेलका सुरक्षा गार्डको अगाडि उत्तेजक हर्कत गरेर जेलमा थुनिएकी आफ्नी आमालाई भगाउन सफल भएकी छिन् ।

द सनका अनुसार इन्स्ताग्रामकी मोडल भिक्टोरिया मेरलानो पहिले जेलका सुरक्षा गार्डको अगाडि उत्तेजक हर्कत गरेर गार्डलाई भुलाइन् र डोरी र बाइकको सहाराले आफ्नी आमालाई भगाएकी थिइन् ।

यसको लागि उनले आफ्नो सुन्दरताको सहारा लिइन् । अदालतमा मुद्दाको सुनुवाइको क्रममा मोडलमाथि उनले पूर्व राजनेता एडा मेरलानो रेबोलेडोलाई बोगोटा जेलबाट भाग्न सहयोग गरेको आरोप लगाइएको छ ।

रिपोर्टअनुसार जेलको तेस्रो तलाको झ्यालबाट बाहिर निस्किएर डोरीको उपयोग गरेर ती मोडलकी आमा जमिनमा ओर्लिइन् त्यसपछि त्यहाँबाट फरार भइन् । मोडलकी आमा मेरलानो रेबोलेडो सिनेटर थिइन् ।

२०१९ मा उनलाई चुनाब जित्नको लागि अवैध हतियार, मतदाताको घोटाला र भ्रष्टाचारको मामिलामा दोषी ठहर गरेर जेलमा हालिएको थियो ।