काठमाडौं । पर्यटन बोर्डमा यति ग्रुपको हालीमुहाली बढिरहेको छ । यति ग्रुपकै डिजाइनमा पेम्पा शेर्पालाई बोर्डको सदस्यमा नियुक्ति गर्न बिचौलियाहरुले ४० लाख रुपैयाँ बुझिसकेको स्रोतले बताएको छ ।

बिहीबार बोर्ड सदस्यमा  लिला लामा नियुक्त भएका थिए ।  अर्कोतिर छनोट समितिका सदस्य राजेन्द्र सापकोटा र बोर्डका उपाध्यक्ष चन्द्र लामासहितका बिचौलियाहरुले यति समूहका सोनाम छिरिङ शेर्पाको सिफारिसमा पेम्वा लामालाई नियुक्तिको तयारी गरेका छन् ।

छनोट समितिका सदस्य राजेन्द्र सापकोटाहरुले पेम्बालाई सोनामसँग भेट गराई नियुक्तिको चाँजोपाँचो मिलाएका छन् । संभवतः सोमबार (आजै) छनोट समिति गठन गरी पेम्वालाई नियुक्ति गराउन लागिएको छ ।

आइतबार यति समूहका प्रमुख सोनामछिरिङ शेर्पाको कार्यालयमा पेम्वालाई पर्यटन बोर्ड सदस्य बनाउने तय गरिएको छ । पर्यटन मन्त्री नेकपा समाजवादीका प्रेमबहादुर आले छन्, तर उनी यति समूहको डिजाइन अनुसार चल्न थालेका छन् ।

उनले समाजवादीको सिफारिसलाई भन्दा पनि एमालेका कार्यकर्ताको नियुक्ति गर्दैआएका छन् ।

पर्यटन बोर्डका सदस्य नियुक्तिका लागि छनोट समितिमा राखिएका राजेन्द्र सापकोटा एमालेका महाधिवेशन प्रतिनिधि हुन् । उनी एमाले निकट पर्यटन ब्यवसायी संगठनको नेतृत्वमै छनु ।

तर समाजवादीका मन्त्री आलेले उनलाई पर्यटन बोर्डको सदस्यमा नियुक्ति दिएका छन् ।

पर्यटन बोर्ड सदस्य छनोट समितिको संयोजक होमप्रसाद लुईटेल, सदस्यद्वयमा माया शेर्पा र राजेन्द्र सापकोटालाई राखेका छन् । शेर्पा र सापकोटा दुवै एमालेका कार्यकर्ता हुन् ।

माया शेर्पाको केपी ओलीसँगै कनेक्सन रहेको छ । शेर्पा र सापकोटाको डिजाइनमा मन्त्री आलेले यसअघि नियुक्त गरेका जग्गा दलाल लिला लामाको नियुक्ति विवादमा परिसकेकाले रद्द गर्न बाध्य भएका मन्त्री आलेले एमालेहरुकै योजनामा पेम्बा शेर्पालाई नियुक्ति गर्न लागेका हुन् ।

पेम्वाले ४० लाख रुपैयाँ बिचौलियालाई बुझाइसकेको भन्दै हिंडेका छन् ।