धनगढी । सुदूरपश्चिम प्रदेशसभा बैठकमा नागरिक उन्मुक्ति पार्टी नाउपाका सांसदहरु अनुपस्थित रहेका छन् ।

मुख्यमन्त्री राजेन्द्रसिंह रावलले विश्वासको मत लिने प्रयोजनका लागि राखिएको बिहीबारको बैठकमा नाउपाका सांसदहरु अनुपस्थित भएका हुन् ।

विश्वासको मत प्राप्त गर्न नागरिक उन्मुक्तिको भर गरेको एमाले नेतृत्वको प्रदेश सरकारलाई नागरिक उन्मुक्तिका सांसदहरुको अनुपस्थिततिका कारण विश्वासको मत नपाउने अवस्थामा पुगेको छ ।

विश्वासको मत जुटाउन अन्तिम समयसीमासम्म कसरत गरेका रावलले नागरिक उन्मुक्ति पार्टीलाई मनाउन सकेनन् । पार्टी अध्यक्ष रञ्जिता चौधरीले आफ्ना सांसद तटस्थ बस्ने बताएकी थिइन् ।

अहिले मुख्यमन्त्री रावल प्रदेशसभाको बैठकलाई सम्बोधन गरिरहेका छन् । एमाले, माओवादी, नाउपा र राप्रपाको समर्थनमा मुख्यमन्त्री रावलसँगै माओवादी केन्द्र संसदीय दलका नेता खगराज भट्ट र एमाले संसदीय दलका उपनेता सन्तोष शर्मा थापा बिनाविभागीय मन्त्री नियुक्त भएका थिए ।