काठमाडौं । नेकपा एमालेका महासचिव शंकर पोखरेलले मुलुकको विकास र समृद्धिका लागि एमालेको अर्को विकल्प नभएको बताएका छन् ।

च्यासलस्थित तुलसीलाल स्मृति प्रतिष्ठान भवनमा आयोजित वागमती प्रदेश सम्पर्क कमिटीको दोस्रो अधिवेशनमा बोल्दै महासचिव पोखरेलले यस्तो बताएका हुन्।

महासचिव पोखरेलले वर्तमान सरकारले मुलुकको विकास र समृद्धिको यात्रालाई अवरुद्ध पारेको भन्दै त्यसलाई यथोचित ढंगले सञ्चालन गर्न एमालेलाई रोज्न समेत आह्वान गरे ।

महासचिव पोखरेलले भने,‘अब स्वार्थहरूको गठबन्धन होइन, नीतिगत श्रेष्ठताका आधारमा राजनीतिक नेतृत्व गर्ने परिवेशको निर्माण गर्नुपर्दछ । त्यसका लागि अब हामीले राजनीतिक ध्रुवीकरणको बाटो तय गर्नुपर्दछ। अब राजधानीमा आउने जुनसकै पार्टीका मान्छे भए पनि तपाईंहरूले बुझ्नुपर्दछ । देश जोगाउने हो भने, स्वाधिनता बलियो बनाउने हो भने एमाले रोज्नुपर्दछ । हिजो को कहाँ थियो भन्ने कुरालाई अब बिर्सिनुपर्छ ।’

उनले वर्तमान सरकारलाई स्वार्थी गठबन्धनको संज्ञा दिए । उनले मुलुकको आर्थिक विकास र समृद्धि आवश्यक भए राजनीतिक ध्रुवीकरण अपरिहार्य भएको बताए ।

महासचिव पोखरेलले अहिले जनताले विकास र परिवर्तन खोजेको बताए । फरक प्रसंगमा उनले अवैधानिक आर्थिक चलखेल गरेकाले बैंकहरूले ब्याजदर बढाउनु परेको जिकिर गरे ।