एजेन्सी। अरब महासागरमा लाइबेरियाको झन्डावाहक व्यापारिक जहाज अपहरणको घटनापछि भारतले त्यहाँ आफ्नो एउटा युद्धपोत तैनाथ गरेको छ।

सोमालियाको तटनजिक अपहरणमा परेको उक्त मर्चेन्ट शिपको चालक दलमा केही भारतीयहरु पनि थिए । बिहीबार लाइबेरियाको झन्डा भएको मालबाहक जहाज एमवी लिला नरफल्क जहाज अपरणमा परेको सूचना युके मेरिटाइम ट्रेड अपरेशन्सले दिएको थियो।

युके मेरिटाइम ट्रेड अपरेशन्स बेलायती सेनाको संगठन हो । यसले रणनीतिक समुद्री मागमा अलग अलग जहाजको चाल हेर्छ । बिहीबार साँझ हथियारधारी ५/६ जना जहाजभित्र घुसेका थिए ।

उक्त जहाजमा कयौँ भारतीय नागरिकहरु भएको बताइएको छ । यो घटनालाई नजिकबाट नियालिरहेको नौसेनाको भनाइ छ ।

जहाजको गतिविधिहरु नियाल्ने काम पनि भइरहेको छ । अरब सागरमा जहाज अपहरण र जहाजमाथि आक्रमणका घटनाहरु बढ्न थालेपछि भारतीय नौसेनाले आफ्नो निगरानी तीव्र पारेको थियो ।